februari 19, 2021
fan Guillaume Guillon-Lethière*
Fan Herakles kriich hy de pylken
op ’e bôge, dy’t er letter brûke koe,
de pylken mei in laachje gif,
geskink foar ’t fjoer dat deade hie
de sterke god, fan fûle pine wif,
mar Philoktetes wist net hoe.
Gjin pylk koe hy op Lemnos brûke
nei’t in slang syn giftosk yn it fleis set hie,
fan pine raasde hy it út;
op ’t ûnbewenne eilân koe
hy balte, rûn de wyn fan noard nei súd,
gjinien hie lêst, wat hy ek die.
Ien pylk koe Troje deadlik reitsje:
Herakles hie dy oan Philoktetes jûn,
dus kaam de razer yn de striid;
hy rekke doel, sadat de stêd
troch gif en list ferlear, mar wiid en siid
waard sein, de ear hie Troje wûn.
* Guillaume Guillon-Lethière (1760-1832)
Skilderij ‘Philoktetes op it eilân Lemnos’
februari 5, 2021
fan Peter Paul Rubens*
Se wiene earm en al op jierren,
hiene altyd wenne yn de hut,
dêr’t elkenien foarbyrûn,
se seagen inkeld lju fan fierren.
De goaden woene wolris witte
hoe gastfrij it folk op ierde wie,
dus reizgen Zeus en Hermes
de wrâld oer om soks op te mjitten.
It wolkom koe gjin sprekken lije
foar de gasten yn gewoane klean,
de doarren bleauwen sletten,
foar har wie hap noch slok te krijen.
De hutsdoar kaam lykwols wol iepen,
Baukis en Philemon joegen wat
se ek mar misse koene,
de goaden bleauwen ek te sliepen.
In sûndfloed spielde oer de ierde,
alle wenten waarden wei,
de hut bleau boppe wetter,
die tsjinst as timpel troch de tiden.
* Peter Paul Rubens (1577-1640)
Skilderij ‘Zeus en Hermes by
Philemon en Baukis’