maart 26, 2021
fan Paul Quinsac*
As dochter fan de foarst fan Troje
kaam Achilles har op ’t sear,
de Grykske held dy’t gjin begrutsjen
hie mei wa’t Trojaan, de fijân, wie,
úteinlik soe hy it net roaie.
Foar Polyxena’s eagen deade
hy har broer, tsjin Trojes ear,
en waard dêrnei op har fereale,
wat de Griken seagen as ferrie,
’t wie as de striid foar harren kearde.
Want Troje rekke net fereale,
wie rap mei Achilles klear,
hie mei de Griken gjin begrutsjen,
mar ’t hynder joech de bêste rie:
‘Al bin ’k fan hout, de stêd yn, deale!’
Achilles’ skym rôp op de Griken:
‘Offerje har op myn grêf,
dan is sy by my yn de Hades
en kom ik ta de leafdesdie!’
De dea koe sy doe net ûntwike.
* Paul Quinsac (1858- 1929)
Skilderij ‘De dea fan Polyxena’
maart 12, 2021
fan Nikiforos Lytras*
Polyneikes, broer fan Eteokles,
soannen fan ferneamde Oedipus,
de kening fan stêd Thebe,
dy’t op reis moast, balling waard…
de bruorren soargen foar in les.
Eteokles, broer fan Polyneikes,
beide makken gading nei de troan,
de earste woe foar altyd
kening wêze, wat lei yn syn aard…
de bruorren soargen foar in les.
Polyneikes, broer fan Eteokles,
gie as balling, lykas heit, op reis,
belibbe aventoeren,
guon mei leafde, oare haat…
hy soarge dûbel foar in les.
Eteokles focht tsjin Polyneikes
om stêd Thebe, ’t gie der fûl om wei,
dat beide waarden rekke
troch de dea… wa hie noch baat
by beide broers har libbensles?
* Nikiforos Lytras (1832-1904)
Skilderij ‘Antigone by it lyk
fan har broer Polyneikes’
