Willem Tjerkstra’s thússide

Archive for the Mytebylden category

admin

Antiochus en Stratonike

Mytebylden

fan Jacques-Louis David*

Antiochus wie in jongeman,
fereale op syn styfmem Stratonike,
frou fan foarst Seleukos;
hy koe net ite, wie der stikken fan,
ien koe him helpe, sa die bliken.

Dokters sjogge faak ek yn it hert,
dy fan Seleukos hie de diagnoaze
fêststeld, fong de kening
mei ’t foarbyld fan de doktersfrou yn ’t net,
doe kriich de keningssoan de roazen.

Foarst Seleukos moast syn frou wol jaan
as medisyn oan sike Antiochus;
styfmem Stratonike
koe min oan sa’n ferhâlding noch wat dwaan,
it lei gefoelich, wie net logysk.

* Jacques-Louis David (1748-1825)
Skilderij ‘Antiochus en Stratonike’

 

admin

Andromache

Mytebylden

fan Jacques-Louis  David*

Andromache, frou fan Hektor,
Trojes aldergrutste held,
in frou dy’t folle net genôch ferlear,
sy hat de deaden op har fingers teld
en wie mei njoggen noch net klear.

Heit, har man en noch sân bruorren
waarden troch Achilles slein,
it bloed rûn yn Skamandros, in rivier;
de frou fan Hektor wie har rie te’nein,
de ein kaam noch, it wie safier…

… dat se sjen moast dat har soantsje
fan de muorre smiten waard,
wylst Troje gûlde om dy bernemoard;
de Griken hiene oars net as spotsk praat
doe’t Andromache kaam oan board…

… fan Achilles’ soan, dy’t Pyrrhos
hiet, foar har in anty-held,
dy’t op har ynstiek mei syn spot en spear;
foar Pyrrhos hat him ek in moardner meld…
foar Andromache kaam de kear.

* Jacques-Louis David (1748-1825)
Skilderij ‘Andromache treurt om Hektor’

Archief

Zoeken

  • Categorie

  • Datum