Willem Tjerkstra’s thússide

Archive for the Mytebylden category

admin

Kambyses

Mytebylden

fan Gerard David*

Kambyses, kening fan de Perzen,
kriich Egypte yn syn macht,
wat him yn hert en holle riisde,
op gjin grins sloech hy noch acht.

’t Lyk fan de kening fan Egypte
groef er op, kriich slach op slach,
wêr’t sels syn eigen folk fan griisde,
sa ferlear er syn gesach.

De soan fan ien dy’t hy fertroude,
skeat er dea as wrede god,
wat op syn lege holle wiisde,
dy’t fol waard fan skot op skot.

In minne rjochter liet er strûpe,
op syn stoel kaam ’t hiele fel,
in teken dat syn waansin riisde,
hy sette rjochters soan dêr del.

* Gerard David (sirka 1460-1523)
Skilderij ‘It fillen fan rjochter Sisamnes’



admin

Kallisto

Mytebylden

fan Hendrick Goltzius*

Kallisto wie as nimf in faam
en woe gjin omgong mei in man,
oan Artemis soe sy har wije,
as goadinne fan de jacht
mocht sy Kallisto’s kar wol lije.

It wie god Zeus dy’t by har kaam…
as Artemis, hy naam ’t derfan
troch mei Kallisto dochs te frijen,
dat sy rekke troch him swier,
dit feit mocht Artemis net lije.

Kallisto waard foar straf bearin
en kriich de hûnen op har ôf,
moast sa har tastân swier belije;
Zeus sloech op syn frijster acht,
sy soe fan him ferromming krije.

Kallisto skynde yn de nacht
as Grutte Bear, sy wie gjin frou
mear, manlju moasten har sa mije.

* Hendrick Goltzius (1558-1617)
Skilderij ‘Artemis ûntdekt dat Kallisto swier is’

Archief

Zoeken

  • Categorie

  • Datum