Archive for the Lyrysk Deiboek category

De loft driuwt driigjend fierder
as hie de delslach yn in flits
troch ’t wapen fan in ridder
it ûnheil brocht oer Snits.

De beammen foelen dreunend
as keardels yn in fûle striid
en stieken swak en kreunend
de earms op, ’t wie har tiid.

Want earst wurdt alles romme
wat stiet al jierren yn it paad,
hjir sil in stedsje komme
as midsieusk op ‘e kaart.

In kilometer fierder
ferriist in midsieusk terpelân.
Sis no, wat weaget swierder?
Help Snitsers út ‘e brân.

It bern fertelde fan syn groei,
it stribjen nei in hege kroan;
hy woe de stive stringen kwyt,
syn winsk wie leaver hjoed as moarn.

De foarfaar hie syn stive lea
beskikber steld foar trimmerskip,
dat minskebern berikke sil
de hichte, op it libben grip.

Ik seach myn eigen libben stean,
de stringen stikken troch de groei,
beskikber yn de wittenskip
dat oaren groeie nei myn bloei.