Archive for the Lyrysk Deiboek category

Ut ‘Skûtsjesilen’ fan Lieuwe Pietersen

It kin de skipper wolris misse:
as it seil te heech is foar de mêst,
in twirre komt him falsk oer ’t mad,
se hâlde beide skoaten fêst,
dan slacht ynienen ta syn nuodlik lot.

Men kin de bal net altyd lizze
op it plak fan tichterby it doel,
in oanrin, traap, al wer in punt;
de ynset fûl, de holle koel,
dat is it wêr’t in topper graach mei stunt.

It kin SC ek wolris misse,
sportclub Cambuur of It Hearrenfean,
as ’t seil komt heger as de mêst,
dan sjocht men har beskiten stean,
wylst konkurrinten sile noch foar bêst.

Cartoon fan Frans Verschoor (detail)

De steat dy’t see en oseaan befoer
foar hannel om it grutte jild,
lei oare lannen op syn wil
en hie dêr striid en bloed foar oer.

Foar Ingelân wie it in stek yn ’t each
hoe’t yn syn spoar de Republyk
de wrâld befoer en waard skatryk…
wa hie de macht oer elke weach?

Ut beide lannen foer in sterke float
mei Tromp en Monk as admiraal,
se praten mei kanonnetaal,
Ter Heijde waard in oarlochsoard.

Skip ‘Brederode’ kriich de folle laach,
dat Tromp ferdronk yn ’t eigen bloed
en Monk berôp him op syn moed,
wa’t weachmacht kriich, wie noch de fraach.

* Earste Ingelske oarloch (1652-1654)

** Jan Abrahamsz. Beerstraten (1622-1666)
Skilderij ‘Slach by Ter Heijde’