Willem Tjerkstra’s thússide

Archive for the Lyrysk Deiboek category

admin

Nea wer…

Lyrysk Deiboek


Dêr stiet er heech en dreech,
de swarte fûgel fan de dea,
syn snaffel stekt er fier foarút,
de wjukken binne al wer drûch,
mar wat er opdûkt hat, bringt skea.

’t Is net de glêde iel
dy’t troch syn strôte gliden is,
hy liet dat bist der net wer út;
de iel hie fretten út ’e drek,
sadwaande gie it dêrnei mis.

It gie fan drek nei iel
en fierder nei de ielgoes ta,
dy’t oerbrocht wat er opdien hie,
klapwjukjend nei ferkear en kroech,
gjinien woe sa it firus ha.

Dêr stiet er heech en dreech,
de fûgel dy’t de swarte dea
foar eagen bringt, de pest dy’t gie
de wrâld oer, nea rûn it sa gek
as doe… mar wat wol sizze nea?



admin

Firus

Lyrysk Deiboek

Hy is kroandea, koe it net rêde,
dat syn lêste wurden wiene:
‘Dat it al safier is…’
Doe klonk razend roumuzyk
mei ’t liet: ‘Him waard fataal it firus.’

Hy libbe troch de jierren hinne
mei elk jier der wer in groeiring
by, wat nei it aard is
fan ’t bestean yn Darwins ryk,
mar net as ’t firus al ferspraat is.

Hy hie it firus al as teken
yn de stam, dat tagelyk op
groeien wiisde, nuver
want se binne net gelyk,
wat fragen opropt, soms ek huver.

Is oan it groeien ynherint it
firus? Lit ús dan net wachtsje
oant it al safier is.

Archief

Zoeken

  • Categorie

  • Datum