Willem Tjerkstra’s thússide

Archive for the Keunst category

admin

Weromsjen

Keunst

fan Jacob Backer*

Hy hat it measte al ferlern,
lit him net jilde kwa ferskining
mei in folle holle, glêde hûd
sa’t hy dy hie as bern,
tsjintwurdich hat er ûnderfining.

As jonge hie hy krollich hier
en eagen dy’t de wrâld ferkenden,
alles like doe noch like goed,
syn langstme rikte fier
en heech, mar ’t wie as alles wende.

Sa rûn syn libben troch de tiid,
earst stadich, letter hieltyd rapper,
wylst hy stiver waard mei hân en foet,
syn wrâld waard minder wiid,
hy gie net faak mear nei de kapper.

Dochs hat hy ien ding net ferlern:
weromsjen nei in fier ferline
doe’t noch alles like like goed,
fan bern is hy noch fan,
dêr kin er him noch wol yn fine.

* Jacob Backer (1608/9-1651)
Skilderij ‘Profyl fan in âlde man’
Skilderij ‘Portret fan in jonge mei baret’

admin

Generale warskôging

Keunst

fan Jacob Backer*

It byld fan findel en musket
en brede bannen om de mul
ropt op it langstme nei de iuw
fan goud en mannen op ’t portret
dy’t stribje nei in stjit en slach,
al is it dan mar spul.

Wol harkje nei de generaal
dy’t juster spriek syn soargen út
oer frede dy’t bedrige wurdt
troch oarloch, wol in oar ferhaal
as hjir in slach en dêr in stjit,
dus nim in flink beslút.

De oarloch tusken kâld en waarm
joech skutters romte foar it spul
dat spile waard, wol mei ferdrach,
mar hjoed de dei klinkt lûd alarm
foar oarloch mei raket en drone,
it is gjin flauwe kul.

It byld fan findel en musket
flokt mei ús iuw dy’t freget om
previnsje, oars is ’t faaks te let.

* Jacob Backer (1608-1651)
Skilderij ‘Offisieren en oare skutters
fan wyk V’ 

Archieven

Zoeken

  • Categorie

  • Datum