Willem Tjerkstra’s thússide

Archive for the Keunst category

admin

Meiglide

Keunst

fan George Caleb Bingham*

De kat rûkt noch it fleis,
de rook dy’t fan de hûden komt
fan bizons troch ien skot al rekke…
hy is mei syn bazen ûnderweis.

In rôt kin hy wol oan,
hoewol’t er leaver mûzen mei,
dy’t minder fier as bizons trekke…
him foldocht it sittend farren skoan.

Syn bazen ha de put
derút, ’t wie bannich nei in dei
fan hanneljen mei grutte bekken…
flokke, mar ek swarre hat dan nut.

No nimt de stream har mei
op wei nei hoe’t it fierder komt,
se kinne hjoed de tiid wol rekke…
’t waar op de Missouri is dernei.

De kat sit stil foarop
te sjen; wat mei glydt wat er net
begrypt, is wol te brekken
mei syn poat en fuort is dan de kop.

* George Caleb Bingham (1811-1879)
Skilderij ‘Pelshannelers litte
har driuwe op de Missouri’

admin

Yn need

Keunst


fan Jan van Goyen*

It sân begûn te stowen,
de brâning rôle fierder as
by ’t rizen fan de sinne,
blêden kundigen it oan,
lykas it koeren fan de dowen.

Hy koe der krekt noch komme,
it sket kaam him wol goed fan pas
by syn ferinnewearre
skuorke, ’t foel net út ’e toan
by ’t flitsen en it fiere brommen.

Fan ûnderen nei boppen,
syn wâljend inerlik kaam los;
by  ’t oangean fan de tonger
seach er himelsk klear de troan
fan God, dy’t harke nei syn roppen:

‘Wol net ferinnewearje
de boer, hy sit hjir… krap by kas.’

* Jan van Goyen (1596-1656)
Skilderij ‘Tonger’

Archief

Zoeken

  • Categorie

  • Datum