Archive for the Keunst category

De spanning hinget yn de loft
krekt foar it alderlêste skot,
it bôgefolk hâldt al de siken yn,
de hûn stiet stil, ferwachtet wat,
mar ’t duorret foar ’t gefoel in skoft.

Noch mar in skoftke is it lyn
dat fjoer mei tonger ’t spul bedoar,
de lêste bôgesjitter wachtsje moast,
mar oerdreaun is de bui, in spoar
fan wolken wâlet op ‘e wyn.

De bôge hinget foar it boarst,
wylst brekt de sinne hoeden troch
en stekt it fjoer oan op it sjittersfjild;
de pylk en siken stûkje noch,
bekend wurdt nea de bôgefoarst.

* David Teniers de Jonge* (1610-1690)
wie master yn it skildersgilde fan Antwerpen.
Hy waard bekend troch syn sjenrestikken
en skilderijen fan bûtenaktiviteiten, dêr’t
‘De bôgesjitterswedstriid’ in foarbyld fan is.

Se wjukken sjongend troch it himelryk,
sa seit in âld ferhaal,
de ingels mei it tsjeppe stjermodel,
sy winsken har oan God gelyk,
dêr kaam it wol op del.

It front, dat eage like tsjep fan lea,
sa seit it âld ferhaal,
gjin aspiraasje hie foar stjermodel,
mar sjongend oan de Heare bea,
dat reagearre fel.

Der briek doe út in helske himelstriid,
it is in rûch ferhaal,
mei wapens, ek foar elk in dieremal
dy’t stribbe nei Gods skeppingsdied,
sy kamen ta de fal.

Sa sonken mâle stjerren nei de hel,
it waard in nij ferhaal
dat spilet yn it sike minskebrein
in duvelsk spul fan sel nei sel
mei ’t winskjen nei de ein.

* Frans Floris (sirka 1520-1570)
wie in Flaamske skilder,
dy’t nei alle gedachten yn Italië
ynspirearre waard troch Michelangelo.