Willem Tjerkstra’s thússide

Archive for the Keunst category

admin

Simson en Delila

Keunst
PDF Print E-mail
fan Adriaen de Vries*

Image

Simson, keardel mei dyn sterke spieren
fochtst tsjin liuw en Filistyn,
mochtst dyn geheim gjin mins fertelle,
waardst troch skientme dûbel blyn,
seachst net de trilling yn har spieren,
hoe’t sy glimke flaaikjend fyn,
seachst ien kant fan it byld, de felle
flam fan erotyk, de skyn.

Do, Delila seachst it fan mear kanten,
seks foar dy wie ’t deistich brea,
want alle dagen hiesto klanten
en ferfele die ’t dy nea,
it eigen folk kaam op it earste
plak, dyn stoere held ta skea
en fan it jild holdst noch it measte:
alle kanten, sels de dea.

Image

Dan sil no it sterke drama heve
mei de linkerhân yn ’t hier,
de rjochter litsto noch wat sweve,
út begrutsjen mei it dier?
Wy sjogge it fan alle kanten
dat it skearmes wie te swier
foar dy nei alle geile klanten
slommest boppe Simsons hier.

* Adriaen de Vries (sirka 1546-1626)
wie in apotekerssoan út De Haach.
Hy krige syn oplieding as byldhouwer
yn Italië en waard dêr ferneamd.
Fan de stêd Augsburg kaam de opdracht
om in grutte fontein te meitsjen.
Yn 1601 waard er hôfbyldhouwer
yn tsjinst fan keizer Rudolf II te Praach.
It byldsje fan Simson en Delila
is 41,5 sintimeter heech.

admin

Ruters op it strân

Keunst
PDF Print E-mail
fan Paul Gauguin*

Image

It blaugrien sjongt it rûzjen fan de see,
it rôze ropt oer de waarmte fan it strân,
de sinne set de brune lea yn brân,
wylst sleept de wyn de skilder nei syn stee.

Bretagne is de Stille Súdsee net,
de kust fan famkes mei it skeane each
dat sjocht as wiene se hjir bûten set
yn stoarmjend waar mei weagen as in pleach.

Image

Hoe sil de skilder ’t lân fan westewyn
besile mei syn waarme kleurpalet?
Hy set it seil en weaget bûten wet
fan strakke styl de fiere wrâlden yn.

Image

Mar lizzen bliuwt de wiere optimist
mei lege akku’s yn de kop fan stiel
dy’t fantasearret sûnder dat er mist
Hawai, werklikheid as ûnderdiel.

* Paul Gauguin (1848- 1903) wie in Frânske skilder.
Hy socht syn hiele libben nei it paradys sawol
geografysk as artistyk.
Gauguin befoer alle oseanen om út te kommen
op ‘e Marquises eilannen yn de Stille Súdsee.
Syn skilderijen tsjûgje fan in brede opset
en waarme kleuren.

Archief

Zoeken

  • Categorie

  • Datum