Archive for the Keunst category

De skilder lei ’t palet skean del
en stiek de kwasten yn it gat,
sei doe tsjin Paula, syn model,
hâld efkes lins en rin mar wat.

Se kaam oerein en loek it kleed,
trochsichtich, heger oer it fel
en hold it rôze losjes beet,
it kaam op iepen hâlding del.

Se rûn om ezel en palet,
de eachopslach, yn noch gjin tel,
ûntdekte ’t hingjende skelet,
se waard net skruten, ek net kjel.

Dêr stie se mei har, each yn gat,
en lies it briefke op ‘e krún:
Rosine, earst sa moai as wat,
wie as in roas yn Venus’ tún.

De skilder pakte ’t ark wer op,
wylst ’t each nei beide famkes loek
en sketste har fan kont oant top
as twilling op it blanke doek.

* Antoine Wiertz (1806-1865)
waard berne yn Dinant en studearre
op ‘e keunstakademy yn Antwerpen.
Hy makke útsûnderlike skilderijen.
Yn Brussel hied er in gigantysk atelier
en in eigen museum.   

It lêste deiljocht strykt oer ’t gea
de kleuren fan de nederlaach;
fiktoarje kraaiend wie ’t begjin,
de striid ferrûn as yn in flaach
dy’t yn de jûn stonk nei de dea.

De hynders hawwe lang noch draafd
en harke nei de baas-huzaar
dy’t raasde dat it bloed waard tin;
no lizze sy yn wyn en waar,
gjinien dy’t noch har grêven graaft.

Dêr komt omheech de kurassier,
dy’t skûle tusken ’t hynstefleis
foar kûgels sûnder doel of sin;
wa wit wie dit syn lêste reis
en bliedt er dea by ’t eale dier.

Wol deale, nee, wie dit it no?
Hy draait de holle stadich om
en sjocht de liken, nee, ik bin
yn libben, mar net út op rom,
nee, nea wurdt dit myn Waterloo.

* Eugène Delacroix (1798-1863) wie yn de skilderkeunst
ien fan de earste fertsjintwurdigers fan de Romantyk.
It skilderij ‘De jûn nei de slach by Waterloo’
is mei it aksint op kleur in goed foarbyld fan syn styl.