Archive for the Bibelbylden category

Jaïrus oer libben en dea

fan Ilja Repin*

Sels ik, behearder fan de synagoge,
bliuw net frij fan leed en dea
dy’t taslaan yn de eigen wente,
it gie net om myn eigen siel en lea…
de dea fan bern kin dochs net doge?

Us lytse faam wie siik, ik seach har lijen,
koe ’t net oansjen hoe’t se lei
en ha it oan de mem oerlitten,
ik wynde my as heit der sa foarwei,
dochs woe ’k it wer yn lykwicht krije.

De man út Nazaret seach ik op strjitte,
bin op slach nei him ta set,
op knibbels ha ’k syn help ynroppen,
ik hearde roppen dat it wie te let…
soe ik as heit it dan net witte?

Mar Jezus woe sa net, ik kriich fertrouwen,
hoe of wat, ik wist it net,
’k bin hymjend nei  ús wente drafke
en seach en hearde ’t daliks, ’t wie te let:
in aaklik kleiliet fan de frouwen.

Doe’t Jezus sei, ús famke lei te sliepen,
hearde ik, dat wie net sa
en bûtendoar waard  lûdop lake;
syn grutte hân gie op har hantsje ta…
se die de eagen daliks iepen.

*Ilja Repin (1844-1930)
Skilderij ‘De opwekking fan de dochter fan Jaïrus’

De gekke fan Gadara

fan Rombout van den Hoeye
en Maerten de Vos*

Dêr bin ik wer, sa as foarhinne
doe’t ik noch myn eigen namme hie
en net as Legioen troch ’t libben gie,
fan binnen party stimmen dy’t my stjoerden,
’k wie mysels net, koe doe amper rinne,
mar dy iene stim ferstie
it stimmelegioen, it waard deastil,
ik hearde wol in do dy’t koerde,
wist my op dat stuit gjin rie,
omdat it legioen opnij begûn,
mar wol hiel oars, net in befel,
in smeken om bestean te bliuwen,
wer dyselde stim, dy’t fan har wûn,
se fleagen daliks út my wei,
it wie as kaam ik út ’e hel
mei duvels om my op te driuwen,
mar doe dreauwen sy de bargen op,
dêr’t dy stim har hinne stjoerde,
by de hichte del, de mar yn,
ik moat der net oan tinke
dat se my de mar yn jage hiene.
Ik wie stil, der klonk in rop:
gâns folk kaam op it barren ôf,
fan harren mocht gjin baarch ferdrinke,
mar mei myn sûnens kaam it net sa nau,
dat ik woe graach dêrwei en mei him mei,
o ja, fan Jezus wie dy iene stim,
mar hy woe ha, ik soe oan diskant bliuwe
om te sizzen wat hy die en sei.

* Rombout van den Hoeye (1622-1671)
Maerten de Vos (1531/1532-1603)
Yllustraasje ‘Genêzing fan de waansinnige fan Gadara’