Willem Tjerkstra’s thússide

Archive for the Bibelbylden category

admin

Herodes syn gewisse

Bibelbylden

fan Caravaggio*

It hie net wêze moatten,
mar koe ik der wat oan dwaan,
sy frege om Jehannes’ holle,
wat moast ik oars de dochter jaan?

Sy hat in spultsje spile
nei har dûns doe’t ’k jierdei wie,
Jehannes’ holle liet se rôlje,
it wie Heródias har rie.

Myn frou siet noch fol grime
oer Jehannes, wrachtich wier,
de troubrek hie hy ús ferwiten,
dy útspraak woech by har noch swier.

Ik koe der net omhinne
nei har dûns, ik hie it sward,
de dochter koe fan alles winskje
en sa is doe it bloedspul bard.

Ik krij it noch foar eagen,
bluodrich lei er op in skaal,
de holle eage as in oanklacht:
myn oanspraak yn dyn eigen taal.

It spriek my oan, myn eigen
oarders, kommend op ’e lea
fan wa’t net nei myn wetten dogge…
hoe is it libben nei de dea?

* Caravaggio (1571-1610)
Skilderij ‘Salomé mei de holle
fan Jehannes de Doper’

admin

Jehannes en Judas op ‘e weromreis

Bibelbylden

Dêr rinne wy dan wer tegearre
mei net mear as op ’e hinnereis,
teminsten fielend it gewicht;
sis Judas, ’k bin benijd watst seist
oer it ferrin, ik wol dyn miening hearre.

Ik wol no daliks net jûchheie,
mar it foel my, earlik sein, net ôf,
ien doar mar bleau foar ’t boadskip ticht
en fierder soarge mem de frou
foar ’t miel, ik mocht de reis mei dy wol lije.

Dyn útspraak seit noch net safolle
oer de útkomst, wêr’t it eins om giet:
Gods Keninkryk komt yn it sicht
mei ’t wurd en boppe-al de died,
de ynspiraasje út ús hert en holle.

Jehannes, wat in grutte wurden
foar de jongste, mar ik jou wol ta
dat wy foldiene oan de plicht
dat minsken wat mear útsicht ha,
guon siken binne sels wer better wurden.

Archieven

Zoeken

  • Categorie

  • Datum