oktober 25, 2017
fan ûnbekend*
Al jierren ha ik learaar west
om Mozes’ wet te ûnderwizen,
dêrom wit ik hoe’t it sit
en ek dat men de sûnder mijt,
dy Jezus lykwols leart dy rest,
sa’t ik se neam,
ik kin der wol fan grize.
Hy kaam mei in ferhaaltsje oan
om ús op syn gelyk te wizen,
fan in hoeder mei syn skiep,
fan hûndert rekke hy ien kwyt,
dy sette neffens him de toan,
sa’t ik it neam,
hy hat dy iene prize.
Gjin tinken oan dat ik it bin,
dy hoeder om mar ien te sykjen,
boppedat is ’t in berop
dat elkenien it leafste mijt,
dy Jezus praat himsels dus tsjin,
sa’t ik it sjoch,
bliuwt hy as learaar stykjen.
Yllustraasje ‘De goede hoeder’
oktober 21, 2017
fan Peter Paul Rubens*
Net dat ik wer nei hûs ta wol,
mar by ús master falt it wier net ta,
hy freget nochal wat fan ús:
him stelle boppe frou en bern
en drage dan ek noch ús krús.
De fraach is: hâlde wy it fol
en ek wêr giet dit op it lêst op ta,
wa hat it no oer ’t eigen krús?
Wy moatte nei de takomst sjen,
woe Jezus ha, dus net nei thús.
Hy joech it foarbyld fan de bou:
set net útein foardatst de kosten witst,
oars komt it bouwurk grif net klear,
’t ferbân mei ús koe ’k earst net sjen,
fan jild en sa wit Judas mear.
It twadde foarbyld kaam al gau:
in kening dy’t strategysk ynsicht mist,
ferliest de slach… is dat syn krús?
Wy moatte it faaks sa besjen:
it krús heart grif by Jezus thús.
* Peter Paul Rubens (1571-1640)
Skilderij ‘Bartoloméus’