december 23, 2017
fan Jan Luyken*
It komt frjemd oer, ik jou it ta,
om yn in beam te klimmen
as garder fan de tol,
myn eagen moasten har gerak ek ha,
se soene noch fan blidens glimme.
Ik bin mar lyts, woe him wol sjen,
en dus moast ik wol klimme,
ik siet net yn myn rol
as garder fan de tol… as wie ’k in bern,
doe hearde ’k yn de fierte stimmen.
It waard ynienen stil, de stim
fan Jezus koe ik hearre:
‘Sachéus, ’k bin dyn gast,
kom rap wer by de stam del nei dyn klim.’
Ik jout it ta, bin doe opfearre.
’t Kaam by in protte folk frjemd oer,
de master by my ite;
ik helle út ’e kast
jild foar de earmen, ’t wie foar my gjin toer…
de klim hat my gjin oere spiten.
* Jan Luyken (1649-1712)
Yllustraasje ‘Jezus sjocht Sachéus yn de figebeam’
december 16, 2017
fan Nicolas Poussin*
‘Soan fan David,’ ha ik roppen,
sûnder noch te witten wat ik sei,
’t kaam samar yn my op,
faaks kriich ik it fan boppen.
Blyn wie ik, nea seach ’k de sinne,
altyd tsjuster, wie it nacht of dei?
Doe hearde ik de rop
oer Jezus, rap derhinne.
‘Soan fan David, ha meilijen,’
rôp ik, mar se snauden my doe ta:
‘Hâld do dy no mar stil!’
As soe de Soan my mije.
Ik mocht lykwols by him komme,
leaude hy woe my it sicht ta ha,
wat spoarde mei syn wil…
myn útsicht waard ferromme.
* Nicolas Poussin (1594-1665)
Skilderij ‘Kristus genêst de bline fan Jericho’