Archive for the Bibelbylden category

Ynspiraasje foar de Griken

fan ûnbekend*

Wy komme hielendal út Grikelân,
de reis ha wy der wol foar oer,
omdat wy Joaden binne
mei ’t each op ’t Peaskefeest,
foar altyd bliuwt dy hechte bân…
wa lit Jeruzalem dan rinne?

Doe’t wy dêr wiene, hearden wy ’t berjocht
oer ien dy’t wat te sizzen hie,
syn maat brocht ús derhinne;
swart fan minsken wie it dêr,
mar hy stie yn it folle ljocht,
lykas de timpel yn de sinne.

Ferhearliking, dat hearden wy it earst,
doe kaam in kerrel yn de grûn
om foar de frucht te stjerren;
oandien spriek er ús sa ta
as wie er oandreaun troch de geast,
syn wurden ha ús ynspirearre.

Doe klonk fan boppen: ’Sjoch myn hearlikheid!’
Guon seine, ’t wie in tongerklap,
mar ’t hat ús iepenbierre
dat syn stânpunt hiel wat seit.

Byldegroep ‘Griken freegje tagong ta Jezus’

Fôlebaas as foarst

fan Giotto*

My is noch nea in bist ûntstellen,
mar hjoed soe ’t wêze, tocht ik earst:
twa manlju rûnen nei myn fôle,
ik derhinne, want dat earme bist
waard grif net om ’e nocht ophelle.

Ik ha ’t net daliks heech opspile,
mar frege freonlik nei it doel:
har master moast myn fôle brûke,
sa op ’t each wie it in frjemde boel…
hie ik it bist dêrmei ferspile?

De boel wie amper te fertrouwen,
dat ik der hastich achteroan,
wat ik doe seach, ’t koe amper mâler:
stapte dêr myn fôle as in troan?
Dêrop gjin foarst mei gouden mouwen.

Gewoan in man, as kening eare,
in foarst dy’t op myn fôle siet,
dy eare koe ik ek wol brûke,
’t fielde as iksels oer strjitte ried…
en ’t folk mar oer ús yntocht beare.

* Giotto (1266/1267-1337)
Skilderij ‘Yntocht yn Jeruzalem’