Willem Tjerkstra’s thússide

Archive for the Bibelbylden category

admin

Andréas oer fuotwaskjen

Bibelbylden

fan Ford Madox Brown*

It wie wer rekke mei myn broer,
krekt foar’t mienskiplik miel,
doe’t hy frjemd reagearre:
’t giet by him fan bakboard oer nei stjoer.

By Petrus giet it hinne wer,
’t is neat of hielendal
as koed er net wurdearje
wat krekt dien waard foar ús allegear.

Ik jou it ta, ’t is net gewoan,
sa foar’t mienskiplik miel,
dat Jezus wosk ús fuotten,
Petrus wegere op hege toan.

Doe’t Jezus him ek wegere,
hy hearde der net by,
gie Petrus oer nei stjoerboard:
hân en holle, ek it hegere.

It rekke my wat Jezus die
en sei: ‘Dus tsjinje jim
elkoar, de minste wêze,
lykas ik jûn by it miel ek wie.’

* Ford Madox Brown (1821-1893)
Skilderij ‘Jezus wasket de fuotten fan Petrus’

admin

Jehannes nêst Jezus

Bibelbylden

fan Leonardo da Vinci*



It is wol wier wat Petrus sei,
dat Jezus ek in foarkar hie,
sa kriich ik njonken him in plak
oan tafel by it lêste miel,
it lêste, sa’t er blike liet,
wat net in fleurich boadskip wie,
it stelde ús net op ’t gemak.

Wol hie er útsjoen nei de dei
dat hy mei ús oan tafel siet
en letter yn Gods keninkryk,
teminsten ’t kaam sa op my oer,
sels Petrus reagearre net,
gjinien wit hoe’t dat letter giet…
is oan dy tafel elk gelyk?

It waard deastil doe’t Jezus sei
by  ’t brekken fan it Peaskebrea
dat dit syn eigen lichem wie,
hy naam de beker mei syn bloed,
sa brocht hy dat as teken oer…
soe ’t miel dan tsjutte op syn dea?
Gjinien dy’t wat te sizzen hie.

Noch tryster waard foar ús de dei
doe’t Jezus spriek oer it ferried
troch ien fan ús, dy iet ek mei,
’t joech grutte opskuor, want wa wie ’t?

* Leonardo da Vinci (1452-1519)
Skilderij ‘It lêste nachtmiel’

Archieven

Zoeken

  • Categorie

  • Datum