Willem Tjerkstra’s thússide

Archive for the Bibelbylden category

admin

Rêste by Joazef fan Arimatéa

Bibelbylden

fan ûnbekend*



Hoe soe ik dizze dei ferjitte
kinne fan it libben en de dea
oan ’t krús, mar ek dêrnei…
men koe it lyk net lizze litte.

Ik ha noch pleite foar syn libben,
mar ik stie allinnich yn de Rie
en gie der net yn mei
dat sy syn krusiging neistribben.

Gjinien koe doe syn libben rêde,
nei de ein ha ’k by Pilatus west
mei ’t útstel fan in grêf,
’k jou ta, it gie mei swiere trêden.

Ik moast der mar mei rêde, liet er
witte, gjin gedoente mei de rest,
sa kaam it op my oer,
yn folkstaal: gjin gesoademiter.

In grêf jaan wie it alderlêste
wat ik dwaan koe foar de Hear, dy’t stoar
ûnskuldich oan it krús,
no kin syn lichem by my rêste.

* Byld ‘Joazef fan Arimatéa’ (sirka 1520)

admin

As offisier

Bibelbylden

fan Pieter lastman



As offisier hie ik de lieding,
soarge dus dat alles goed ferrûn
mei balken, spikers en de hammer,
trije krusen stieken yn de grûn,
op ôfstân mei de krekte sprieding.

Neat mei der einliks tuskenkomme,
tafal slútst as offisier dus út,
ik bin noch nea yn ’t amt beskamme,
nim korrekt op tiid in goed beslút…
slaan foar mysels net op ’e tromme.

Nei hjoed alhiel net, midden op ’e
dei hie ik it net mear yn de hân,
it fielde lykas wie ’k ferlamme,
want de neare nacht loek oer it lân,
fan boppen hearde ik him roppen:

‘Heit, myn geast betrou ik yn Jo hannen!’
Ik fielde my foar ’t earst beskamme.

* Pieter Lastman (1583-1633)
Skilderij ‘De krusiging’

Archieven

Zoeken

  • Categorie

  • Datum