Willem Tjerkstra’s thússide

Archive for the Bibelbylden category

admin

Pleit fan Barnabas

Bibelbylden

fan ûnbekend*



Soe hy der net by hearre,
Saulus, earder fûl tsjin ús
as learlingen fan Jezus?
Hy reizge út Damaskus wei,
dêr’t hy it blide boadskip brocht,
dus fielt er him hjir thús.

Soe hy ’t foar ús bedjerre,
om’t er fûl tsjin Jezus wie
en Stefanus ferfolge?
Hy reizge nei Jeruzalem,
waard konfrontearre mei it ljocht,
dat wat te sizzen hie.

Sa ha ’k foar Saulus pleite
doe’t er hjir gjin oanhâld fûn,
al hearde hy by Jezus;
it slagge, want no docht er mei
en wurdt fan kwea net mear fertocht,
wat west hat, is ferjûn.

Wat west hat, kin ferkeare,
want de Grykske Joaden ha
it no fersjoen op Saulus;
hy fynt dy wjerstân net sa slim,
mar syn bestean leit ús net sljocht,
hy moat nei Tarsus ta.

* Byld yn ‘Eglise St-Cécile’ yn Theix yn Frankryk

admin

By de muorre del

Bibelbylden

fan Philip Galle*

Wy hawwe Saulus sakje litten
by de muorre fan Damaskus del,
om’t alle poarten sletten wiene:
de stêd as sel.

Us bruorren, lykas wy ek Joaden,
woene him de dea ynjeie, mar
hoe soe men soks gewurde litte?
It wie te bar.

Om’t Saulus yn de synagogen
fan Damaskus goede wurden hie
foar Jezus, wie dat foar de Joaden
in misse die.

Us eagen giene troch him iepen
lykas dat by Saulus ek bard wie,
hy hat ús op ’en paad meinommen
sa’t hy ek gie.

Mar nachts ha wy de man meinommen
nei de muorre, stadich derby del,
om’t wy as Joaden iepen stiene,
al slút de sel.

* Philip Galle (1537-1612)
Yllustraasje ‘Saulus ûntsnapt út Damaskus’

Archieven

Zoeken

  • Categorie

  • Datum