maart 12, 2024
fan ûnbekend*
Ezechiël
Stêd Siodon, harkje wat de Heare seit:
‘Yn dyn fermidden sjochsto My
ferskinen yn myn gloarje,
rjochtdei hâld Ik dan oer dy:
de pest sil swalkje troch de stêd,
it bloed rint troch de strjitten,
rûnom giet it swurd te kear,
Ik bin de Hear, dy’t Israel wol rêdt.’
Folk Israel, hear wat de Heare seit:
‘Ferachting is net mear dyn diel,
dy’t stekt as skerpe stikel,
oer de hûd as toarne skramt,
Ik lit myn hillichheid dy sjen,
op eigen grûn silst wenje,
folken jouwe dy de ear,
Ik bin de Hear, dy’t Israel wol ken.’
* Foto ‘Seekastiel Sidon’
maart 4, 2024
fan ûnbekend*
Ezechiël
Foarst fan Tyrus, hear hoest wiest:
in toanbyld fan folsleinens,
fol fan wiisheid en ûneinich moai,
do wennest yn it hôf fan Eden,
edelstiennen hiest as toai,
do wiest in kearûb-ingel,
stiest op wacht, de wjukken wiid,
giest ek op wei de berch bydel,
mar doe briek oan in oare tiid.
Foarst fan Tyrus, hear hoest giest
de hannel yn, ferfallen
bist ta grutspraak, heechmoed en geweld;
ferballe út it hôf fan Eden,
waardst as wachter net mear teld,
bist op ’e ierde smiten,
wurdst slachtoffer yn it fjoer,
ferstoost as jiske yn it rûn,
neat bliuwt der fan dyn toanbyld oer.
* Yllustraasje ‘Kearûb-ingel’