mei 15, 2024
fan ûnbekend*
Ezechiël
De Heare joech my as profeet
it byld fan skiep en minne hoeders,
de lieders fan it earme folk
dat oer de wrâld fersille rekke,
fan dit byld wie ik de tolk.
De hoeders molken harren út
en holden foar harsels de molke,
de wol waard brûkt foar ’t eigen kleed,
it fleis fan ’t mestfee ha sy iten,
wylst de keppel wie yn need.
It swakke skiep kriich syn gerak
net, foar it sike waard net soarge,
’t ferwûne hat gjinien ferbûn,
it swalkjend skiep moast him mar rêde,
hat de keppel nea wer fûn.
De Heare sil de hoeders fan
de skiep net sparje, mar oanpakke…
de lieders slacht Hy mei de ban.
* Foto ‘Skiep sûnder hoeder’
mei 12, 2024
fan ûnbekend*
Ezechiël
Minskesoan, hast wol fernommen
dat it folk it oer dy hat?
It praat giet by de doarren lâns
om út en troch by dy te kommen.
Yn in kloft sjochsto har kommen,
sittend harkje sy nei dy
as wiene sy myn folk dat trou
is oan myn Wurd, sabeare frommen.
Elkenien heart nei dyn wurden,
mar gjinien docht watsto seist,
ast har sa hearst, dan bart dat wol,
mar har bestean is al ferwurde.
Foar dat folk bisto in sjonger
by de lier, dyn leafdesliet
klinkt moai, mar nimmen docht dêrnei,
nei ’t wiere Wurd ha sy gjin honger.
* Yllustraasje ‘Lierspiler’