Wachtsjende sielen

fan El Greco*

Noch trije segels bleauwen oer
om te ferbrekken troch it Laam,
de fiifde segel briek Hy iepen…
wat my doe foar eagen kaam,
wie in alter mei de sielen
fan it folk dat tsjûge hie foar God
en inkeld dêrom ombrocht wie;
se rôpen lûd, alhiel oerstjoer:
‘Wannear is ’t rjochtdei om te wreken,
opdat dieders harren skuldich fiele?’
Elk krige doe it wite kleed,
fan suverens wie dat it teken,
mar de rjochtdei kaam noch net,
har bruorren rekken earst yn need
en ûndergongen ’t selde lot
yn tsjinst fan God. 

* El Greco (1541-1614)
Skilderij ‘It fiifde segel’