Posted by admin

Ik wie derby dy dei fan pracht en preal
en naam de kleuren yn de troanseal op
fan ’t geastlik hear en hearen fan de steat;
de tsaar en de tsarina as in peal
sa rjocht de rêch en flink foarút it krop
beskôgen dit as wie de tiid hjoed keard:
de kroanen hongen boppe hollen eal
fan heech komôf en plechtich klonk de rop:
‘Jo wurde inte as de nije leat!’

De sfear fan spanning ha ‘k dy jûntiid preaun,
ferwoeden en fol grime op ‘e tsaar
dy’t út ‘e hichte fan syn goadetroan
it bitend sâlt yn iepen wûnen treaun
hie fan it Russysk folk yn hûnewaar,
mar sjoch hoe’t dêr it fjurrich wurd slacht oan
yn harsens dy’t, fan revolúsje gleon,
bespylje sille fan it folk de snaar
fan kom, tsjoch op, foar ús de nije moarn!

Ik wie der net dy moarntiid, kil en feal,
doe’t kûgels skeaten op befel troch krop
en rêch, ûnttroane, want de tiid wie keard.

* Ilja Repin (1844-1900) is ien fan de belangrykste
Russyske skilders yn it realistyske sjenre.
Hy hat ferskillende episoades út ‘e Russyske skiednis
skildere, lykas ‘De kroaning fan Nikolaas II
en grutfoarstinne Alexandra Fedorovna’
en ‘De gearkomste’.

Wêr is de minske dy’t hjir siet
te lêzen yn de almanak?
In man of earder frou, wat wie
’t mystearje fan dit plak?

De knypbril paste ’t bêst de frou,
sy stiek de lange kears ek oan
en sloech de Bibel iepen, trou
oan ’t alledeisk patroan.

Sy lies it haadstik fan de frou
dy’t kening Saul de wierheid sei:
op ’t striidfjild kaam er yn it nau
en stoar op ljochtskyndei.

De kears stie foar de helte noch,
sy naam in slokje fan de wyn,
doe blêde se dat boekje troch,
mar gie der net op yn.

Nei’t sy it plak ferlitten hie,
kaam hoeden foar it ljocht de man;
mei kears en bril gau út ‘e rie,
foar him in lêshelp span.

Mar bibeltekst en almanak,
dy beide spanden tsjin him gear;
hy fielde him net op syn plak,
ferlear mei Saul de ear.

Hy sloech de Bibel klappend ticht
en swolge fan de wite wyn;
de almanak bleau foar it sicht,
’t mystearje stie dêryn.

* Pieter Claesz (1597/1598-1661)
waard berne yn Burgsteinfurt,
mar ferfear letter nei Haarlem,
dêr’t er de keunst fan it stillibben
beoefene.