Willem Tjerkstra’s thússide

Posted by admin

admin

Nachtwacht

Keunst
PDF Print E-mail
fan Rembrandt van Rijn*

Image

De opdracht kaam fan kaptein Cocq,
’t wie yn de fleur fan ús bestean,
ik tocht myn Saskia hie noch te gean
in libbenlang yn ’t ljocht fan clair-obscur,
sy wie myn leafde en myn lok,
’t palet fol kleuren, klear en puer.

’t Kaam as befel, ik stie foar ’t blok:
in optocht fan de skutterswacht,
beweging mar jou tagelyk ek acht
op de portretten, leafst yn ’t folle ljocht
en grut genôch, gjin byt of brok,
dat wie ’t begjin dêr’t hy oan tocht.

Mei ’t sketsen hie ‘k it fleanend drok,
wylst sy posearren, hjir en dêr,
yn ’t ljocht fan sinne, moanne, wol as stjer
en wiere wapenbruorren fan gewicht,
mar Saskia beseach de gok
en joech de bern ek in gesicht.

De dei kroep nei de jûn, de nacht
kaam fluch, joech inkeld noch obscur,
har libben stûke, wie fan koarte duer;
ik sjoch mysels yn ’t ljocht as stil portret
mei ’t boek as wapen wol op wacht,
mar har palet dat ha ik net.

Image

** Rembrandt van Rijn (1606-1669),
ien fan de grutste Nederlânske skilders,
skildere ‘De Nachtwacht’ fol beweging
en ‘Selsportret’ ferstille, mar beide
yn clair-obscur.

admin

Eksekúsje

Keunst
PDF Print E-mail
fan Francisco Goya*

Image

Wat ha ik noch te sizzen
yn de alderlêste tel?
It bin ien út it sljochte folk,
in Spanjaard sûnder franje,
libjend, fjochtsjend, haatsjend like fel,
want Napoleon sil lizze
troch de grime fan myn dolk
dy’t stekt him djipper yn de hel.
Dit ha ik noch te sizzen:
lang libje Spanje!

Image

Mei it teken yn de hân,
it stigma fan syn striid,
stiek dizze kristus ta,
syn lea as ûnderpân
yn ’t fjurjen, ’t wie syn tiid.

Image

It fljocht foarby de eagen
yn de alderlêste tel:
in libben as in prins gelyk
fan Eastenryk nei ’t fiere
Meksiko as keizer yn de sel,
want Napoleon syn leagen
makket daliks my ta lyk,
o Kristus, sparje my de hel.
Dit ha ik noch foar eagen:
lang libje Eastenryk!

Image

Mei in teken om de krún,
de aura fan syn wil,
seach dizze kristus fier
de bloei fan Edens tún
yn ’t fjurjen, ’t waard doe stil.

* Francisco Goya (1746-1828)
hat in rige etsen makke en
it skilderij ‘De tredde maaie 1808′
oer de ferskrikkings fan de oarloch,
doe’t de troepen fan Napoleon
tusken 1808 en 1814 yn Spanje
húsholden.

** Edouard Manet (1832-1883)
skildere de ‘Eksekúsje fan keizer
Maksimiliaan’ fan Meksiko yn 1867,
dy’t troch keizer Napoleon III
yn de steek litten waard.


Archieven

Zoeken

  • Categorie

  • Datum