Posted by admin

It moat yn dizze tiid de hichte yn
om fêst te stean foar ’t ûnderhâld
fan ’t godshûs dat, al ieuwen âld,
te lijen hat fan waar en wyn.

Hy stiet breedút, de fuotten stangefêst,
de hannen klamme om it stiel,
de helm, oranje boppe, diel
fan ’t spul, fan hichtefrees gjin lêst.

De man fan Nazaret yn tryst swart-wyt
en sûnder hân of foet, jout oan
de toan fan Bach syn passion,
crescendo, njoggen man mei flyt.

It moat yn dizze tiid de hichte yn,
it krús foar ’t geastlik ûnderhâld,
mar ’t godshûs is fan binnen kâld,
’t is ek al tweintich ieuwen lyn.

Peter Paul Rubens

De swarte hintsjes fan it reid
mei reade snaffel, wite sturt
ferkearden hiel de lange winter
yn de stêd ta eigen nut,
omdat de lijte har wol leit.

En doe’t de maitiid einlings kaam,
kriich elkenien ’t hormoaneshot
mei as gefolch in lange sessy,
dy’t ûntaarde yn ’t komplot
fan stikem farre mei de faam.

Soks gie net sûnder slach of stjit,
dus ien stie op ‘e peal op wacht
en soe by ûnrie sturtsjewippe,
wylst de ploech mei man en macht
de boat ferloste fan it spit.

Dy aksje joech de keardels hoop
op ek in goed ferfolchtrajekt,
foaral om mei de faam te frijen,
mar se ha har flink ferrekt
fan ’t skuorren oan dy iene knoop.