januari 29, 2018
Se leine op itselde plak,
de Snitser bûlevaar,
de langte lykwols wie wol oars,
ek foar it each wie der ferskil,
mar beide joegen ûnderdak.
De ‘Krukel’ eage lang en breed,
rûn hurd en gjin gefaar
troch stielen romp en hege noas;
as seeslak makke hy ’t ferskil
mei ’t skipke ûnder ’t blauwe kleed.
Yn knûkels lei it blauwe kleed deroer,
foar rinners like ’t raar:
in bûlevaar joech oan wat oars
as wat se seagen troch har bril
fan kapitein oan ’t rûne roer.
Mar ûnder seil lei droech en djip
de reder fan it skip.
januari 27, 2018
Ut it skûtsje-argyf 2011
It soe wer wêze of dochs net,
nei dagen fan in heale stoarm
gie ’t rap de lege midden yn,
mar foar it waar klonk wer alarm:
in loft fol wolken, mar gjin wyn.
De wolkeloft dreau oer de mar
yn banen heech en leech mei wyn
dy’t striek de fjirtjin yn it seil,
in rige mei de gong deryn,
it waaralarm wie ûnder peil.
De rige sylde nei in kloft,
elk woe wol earst it krúsrek yn,
mar ien foer nei it bêste plak
en kniep it skûtsje oan de wyn,
de oaren leine lilk foar blak.
Wol blaksum, wa kaam om de boei
as earste fan de lêste seis,
’t wie Huzum, sprinter oan de ein
fan fjirtjin dagen ûnderweis,
mar dêrmei wie net alles sein.
Want sprintsje koe ek ’t Hearrenfean,
dat kniep en skraal de boei oanrûn
en sa de lêste wedstriid wûn;
it giel-swart hat de trochslach jûn:
de Pan waard klappend kampioen.