Willem Tjerkstra’s thússide

Archive for augustus, 2017

admin

Elderts mûtske

Skûtsjesilen

Ut it skûtsje-argyf 2006

Hy koe der wier net sûnder,
want it mûtske wie syn amulet
en paste by de reade noas,
fan mear hie Eldert* gjin ferlet,
hy fielde him der feestlik ûnder.

In ramp, want ûnder wetter
wie it mûtske fan de galgeman,
syn talisman fertsjinne oars,
want oars gie Eldert yn de ban
en waard er ûnder skippers ketter.

Hy woe it libben fiere,
dûnse mei de fammen yn it skom
mei blauwe teannen, read de noas,
it mûtske siet him wat te rom
en koe him langer net fersiere.

It gie net mear foar wûnder
yn de earste dagen fan de striid;
it mûtske wie der wer, mar oars,
te krap, de holle fierste wiid,
de noas bleau like read derûnder.

* Eldert Meeter

admin

Op- en delstap

Keunst

fan Giuseppe Maria Crespi*
fan Jean-Louis Théodore Géricault**


Har romte liket net sa rom
mei oanrjocht, kast en planken,
se is mar lyts, de rêch wat krom,
har rjocht op heger is te tankjen
oan de opstap en har eigen wil.

De keuken leit har nei oan ’t hert,
dat kloppet foar it bêste,
wat sy foar it folk op tafel set,
sy komt it earst en stapt as lêste
op, dan wurdt it yn har romte stil.

De hannen binne út it sicht,
it oanrjocht lang ferlitten,
de rêch is krom, de holle licht,
mar dêrom sil sy it net litte…
troch de delstap slyt de eigen wil.

Foar ’t samar kiezen slacht it hert
wat fûler, mar it bêste
komt har nea ta, sy treft it net
en giet faak fuort as alderlêste…
’t is sa dat sy moarn wer komme sil.

* Giuseppe Maria Crespi (1665-1747)
Skilderij ‘De kokkin’

** Jean-Louis Théodore Géricault (1791-1824)
Skilderij ‘De gokferslaafde’

Archieven

Zoeken

  • Categorie

  • Datum