augustus 27, 2017
fan ûnbekend*
fan ûnbekend**
It foarste fytstsjil yn de rûnte
fan it Frânske ryk hat rêst noch doer,
fertrout him blyn ta oan it stjoer,
hat oan Parys ta alles jûn.
De rûnte, âlder al as hûndert
jier, begûn wat frjemd: in krantestriid
rûn foar de sport út op in tiid
fan fytse oant let yn de jûn.
De earste rûnte, seis etappes,
like op in bist mei kop en sturt;
de sechtich rieden net sa hurd,
goed tweintich ha Parys wer fûn.
Maurice Garin waard fierwei earste:
trije oeren foarsprong op Pothier;
de rûnte waard tenei in pree
foar rappe riders, sterk en sûn.
* Foto ‘Start earste Tour de France’ (1903)
** Foto ‘Maurice Garin mei masseur en soantsje’
augustus 26, 2017
fan Rembrandt*
Jimme wolle it net leauwe
om’t jim wisten, hy is stom,
mar no kin elk my hearre,
dêrom gean ’k net langer troch foar dom,
myn blidens kin gjinien bedjerre.
Maten ha fan him wol witten,
nee, ’t idee kaam ik net op,
dus ha se my meinommen…
sels koe ik net hearre fan de rop
dy’t útgie om nei him te kommen.
Master naam my doe fansiden,
nee, ik wist syn namme net,
kriich fingers yn de earen,
hearde neat, hy hie it dus net ret,
mar ’k seach de maten wol drok bearen.
Jimme wolle it net leauwe,
master spuide dêrop ta
en hat myn tonge rekke,
suchtsjend hearde ik doe: ‘Effata**’
en ik… ik koe mei ’t wurd losbrekke.
* Rembrandt (1606-1669)
Tekening ‘Genêzing fan in doofstomme’
** Gean iepen