april 2, 2017
fan ûnbekend*
fan ûnbekend**
Hy waard as militêr fan joadsk komôf
beskuldige fan spionaazje,
mar Alfred Dreyfus wie de naasje trou…
in kwestje fan diskriminaasje.
De Frânske naasje balte moard en brân:
‘De dea oan alle goare Joaden,
de duvel hat de hân der grif yn hân…
in knibbelfal foar falske goaden!’
Dus waard de joadske offisier by wet
feroardield: libbenslang de jierren
op ’t Duvelseilân, dêrby kaam de smet
fan út ’e rang set sûnder skjirre.
Emile Zola, de skriuwer, wie it oer,
hy wist dit Frânske spul hat luzen,
troch ’t antysemitisme waard er poer
en skreau it krekte wurd: ‘J’ accuse!’
Nei fjouwer jier kaam Dreyfus wer werom,
de duvel koe gjin sprekken lije,
de rehabilitaasje sûnder rom
noch, soe de Joad earst letter krije.
* Foto ‘Alfred Dreyfus’
** Yllustraasje ‘Alfred Dreyfus út ’e rang set’
april 1, 2017
fan Ducio di Buoninsegna*
It wie in dei as oare dagen,
tochten wy, teminsten yn de moarn,
broer Petrus wie fansels oan ’t wurd
oer grutter net en lege mage.
Ynienen hearden wy ien roppen,
net ús heit, it barde op in toan
net twingend, oars as Petrus’ wurd:
‘Andréas, skuor it seil nei boppen!’
Ik hie it daliks yn de gaten,
’t komt net op ’t gewoane fiskjen oan,
mar Petrus liet him deroer út:
‘Dy fint wol efkes mei ús prate.’
Gelyk hoech ik no net te krijen,
dêr stie Jezus, ja… fan wa de soan?
Hy liet him oer ús fiskjen út,
mar dan om minsken te befrijen.
* Ducio di Buoninsegna (sirka 1255-1319)
Skilderij ‘Ropping fan Petrus en Andréas’