Willem Tjerkstra’s thússide

Archive for december, 2016

admin

2017

Lyrysk Deiboek

Lit de beammen net mear swart,
mar sier dy mei it wyt fan ryp,
wat sprekt fan fûle kjeld,
sadat gjin skip mear fart
en iis in strange winter meldt.

Lit de kleur fan markols swart,
gjin wjuk wurdt troch de ryp beslein,
ferstive troch de kjeld,
dat elk te fretten hat,
omdat ek dan it libben telt.

Jou it iis in swarte tint
en lit it groeie dei en nacht,
wat sprekt fan fûle kjeld;
dat is al fêst de hint
foar elk dy’t priis op alve stelt.

Lit fan swart it wurde wyt
fan justjes lok yn hiel it jier,
dat him hjoed knallend meldt
en gau al fierder glydt,
lit sjen dat elke oere telt.

admin

Mei langer winne

Skûtsjesilen

Ut it skûtsje-argyf 2004

It hie him wurde moatten
mei Wâldsein sa fier op kop,
gjinien wist noch fan letter,
want it skûtsje foer lang top,
dochs rûn in streek troch ’t wetter.

Dy streek kaam fan De Lemmer,
dy’t in streekje langer wie
as earder, soks moat kinne,
dat Wâldsein wist him gjin rie
en seach De Lemmer winnen.

It wiene manljuskoppen,
keal of mei in pet as sier,
wolno, diskriminaasje!
Sjochris oan, it lange hier
joech fjouwer skûtsjes faasje.